Më 13–14 shkurt 2026, në ambientet e Mother Teresa University in Skopje, u zhvillua takimi zyrtar hapës i projektit CRAFT-VET – Revitalizing Albanian Artisanal Heritage Through Smart Manufacturing and Circular Economy Skills, financuar nga Erasmus+ në kuadër të programit Capacity Building in VET.
Në këtë aktivitet morën pjesë përfaqësues nga të gjithë partnerët e konsorciumit ndërkombëtar. Shkolla Profesionale Elbasan u përfaqësua nga Drejtori Leonidha Haxhinikolla dhe Zv. Drejtori Juljan Kasapi, të cilët kontribuan në diskutimet strategjike mbi drejtimin dhe zbatimin e projektit.
Gjatë dy ditëve të punës u prezantua struktura e përgjithshme e projektit, paketat e punës (Work Packages), mekanizmat e menaxhimit, raportimit financiar dhe sigurimit të cilësisë. U diskutua gjithashtu për zhvillimin e moduleve të reja trajnuese, ngritjen e Smart Craft Labs, integrimin e teknologjive 3D dhe AI në dizajnin artizanal, si dhe përdorimin e blockchain për certifikimin e produkteve.
Fokusi kryesor i CRAFT-VET është forcimi i aftësive profesionale në fushën e zanateve tradicionale, duke i kombinuar ato me inovacionin digjital dhe parimet e ekonomisë qarkore. Projekti synon të krijojë një model të qëndrueshëm bashkëpunimi mes arsimit profesional, tregut të punës dhe sektorit të sipërmarrjes.
Për Shkollën Profesionale Elbasan, pjesëmarrja në këtë projekt përfaqëson një hap të rëndësishëm drejt modernizimit të ofertës arsimore, ndërkombëtarizimit dhe rritjes së cilësisë në formimin profesional. CRAFT-VET do të kontribuojë në zhvillimin e kompetencave të reja për nxënësit dhe stafin, duke forcuar lidhjen mes trashëgimisë artizanale dhe teknologjisë së së ardhmes.
Co-funded by the Erasmus+ Programme of the European Union
